Недвижимость


Ірына Асташкевіч,

Што рабіць з дзяржаўнай маёмасццю, якая перастала быць патрэбнай на вёсцы ўласніку ці дзяржаве? Вось выстаўлены на продаж, напрыклад, у населеным пункце, дзе жыве чалавек 30, дом культуры — прыгожы, з калонамі, плошчай у 1000 метраў квадратных. Апошнія жыхары, у абсалютнай большасці людзі старыя, мастацтва спажываюць выключна праз тэлевізар. Такімі ж нерэнтабельнымі на вёсцы апошнім чынам сталі будынкі дзіцячых садкоў, аптэк, ФАПаў, школ...

Утрымліваць іх занадта дорага для дзяржавы — размовы пра акупнасць нават і не ідзе. Вось і прымаецца ў такім выпадку рашэнне аб іх закрыцці, а потым і продажы праз аўкцыён. Спачатку — для прадпрымальніцкай дзейнасці, а калі няма ахвотных — цяпер стала магчымым і пад жыллё.

Дзякуючы гэтаму варыянту продажу нерухомасці можна вырашыць жыллёвыя праблемы вяскоўцаў — новыя дамы будуюцца ж не паўсюль. Стварэнне аграсядзіб на базе такіх аб'ектаў нерухомасці — таксама нядрэнная перспектыва. Ёсць попыт і пад дачы.

Першы намеснік дырэктара абласнога тэрытарыяльнага фонду дзяржаўнай маёмасці Вольга Швідзянкова расказвае, што ў вёсках цяпер дастаткова многа дзяржаўнай маёмасці, якая не выкарыстоўваецца:
 
— У асноўным гэта былыя аб'екты сацкультбыта. У нас іх больш за 60 % ад таго пераліку, які мы зараз плануем на продаж. У пераліку маёмасці, якую мы будзем уцягваць у гаспадарчы абарот шляхам продажу, здачы ў арэнду ці перадачы іншаму ўласніку, цяпер 324 аб'екты. З іх на продаж — 265 аб'ектаў. На кожны тавар ёсць свой купец. У нас былі выпадкі, калі мы доўга-доўга прадавалі, а потым прыйшоў чалавек, які купіў усё адразу ў адной з вёсак Лоеўскага раёна. Цяпер вялікі інтарэс да аб'ектаў, якія патэнцыяльна можна ператварыць у зону адпачынку.

Дарэчы, былое аддзяленне сувязі ў вёсцы Журавічы Рагачоўскага раёна зусім нядаўна купілі як будучае жыллё — за 100 тысяч рублёў. Гэта стала магчымым пасля падпісання Указа № 294 "Аб парадку распараджэння дзяржаўнай маёмасцю". Цяпер можна прадаваць пустуючыя аб'екты за адну базавую велічыню не толькі пад дзелавыя праекты, як гэта было раней, але і пад жыллё, і пад вядзенне дапаможнай гаспадаркі. Пасля правядзення ўсіх этапаў паніжэння кошту на аб'ект, на Гомельшчыне першымі ў краіне пачалі ўвасабляць у жыццё адпаведны заканадаўчы акт.

Між тым, у Гомельскім абласным фондзе дзяржаўнай маёмасці разумеюць, што пакупніку далёка не ўсё можна прапанаваць. Свінарнік ці кароўнік у чыстым полі наўрад ці можна выкарыстоўваць у якасці жылля ці пляцоўкі для вядзення гаспадаркі. Складана прадаць і дзіцячы садок, плошча якога больш за 1000 м 2 — не кожнаму патрэбен такі вялізны дом. Таму падбіраюць тыя аб'екты, якія больш-менш добра захаваліся і маюць параўнальна невялікую плошчу — закансерваваныя ўстановы адукацыі, аховы здароўя, сувязі... 19 сакавіка пройдзе чарговы аўкцыён, на які будзе выстаўлены гатовы да продажу будынак былой аптэкі ў вёсцы Бывалькі, што ў Лоеўскім раёне.

— Для таго, каб прадаць за адну базавую велічыню аб'ект пад жыллё, трэба правесці як мінімум 6 аўкцыёнаў, — працягвае Вольга Алегаўна. — Калі аб'ект не купілі, мы прадаём яго грамадзянам за адну базавую.

Што тычыцца будынка аптэкі ў вёсцы Бывалькі — гэта рэспубліканскі аб'ект. Мы 10 разоў яго выстаўлялі на аўкцыёны, з 2009 года пакупнікоў не знаходзілася. Можа, цяпер знойдуцца.

Дзяржаўную маёмасць за базавую велічыню пачалі прадаваць з 2007 года. Аднак з таго часу значна ўзрасла пакупніцкая здольнасць многіх прадпрымальнікаў. І менавіта таму летась некаторыя аб'екты на Гомельшчыне прадалі ўжо не за базавую велічыню, а нават за 100 % кошту, расказвае Вольга Швідзянкова.

— Ёсць прыклады, калі прадпрымальнікі знайшлі сабе аб'ект, які яны хацелі б выкарыстоўваць, і проста чакалі, калі мы будзем зніжаць цану на яго. Але ж калі яны дачакаліся паніжэння цаны, напрыклад, на 80 %, на аўкцыён прыйшлі адразу 6 удзельнікаў, і цана на аб'ект узлятала вышэй, чым яго астаткавы кошт. Напрыклад, так мы прадалі аб'ект у Гомелі — усе доўга чакалі паніжэння яго цаны. Пачатковая была 370 мільёнаў. Канчатковая — 1 мільярд 285 мільёнаў. Але ж калі прэтэндэнтаў няма, мы прадаём маёмасць адзінаму — таму, хто заявіў пра сваё жаданне. Такім чынам можна стаць уладальнікам маёмасці без гандлю, пры гэтым працэдура празрыстасці выканана. Мы лічым, што прадаваць нам дапаможа і адмена пераацэнкі маёмасці, якая прадаецца. Цяпер штогод яе вартасць не павялічваецца. Пачатковая цана паніжаецца зыходзячы з цаны, якая была ў тым годзе, калі прынялі рашэнне аб продажы аб'екта нерухомасці.

У спісе таго, што прапануецца на бліжэйшыя аўкцыёны, — шмат аб'ектаў дзяржаўнай маёмасці, якія, хутчэй за ўсё, зробяць перадапошні крок перад тым, каб іх прапанавалі пад жыллё.

— Увогуле мы заявілі пра 40 аб'ектаў, якія могуць быць выкарыстаны пад жыллё, і цана на іх зараз зніжана больш чым на 50 %. На аўкцыён, які адбудзецца 12-13 сакавіка, мы абвясцілі 13 аб'ектаў, размешчаных у Чачэрскім і Буда-Кашалёўскім раёнах. Калі яны не будуць запатрабаваны для прадпрымальніцкай дзейнасці, далей іх будуць прадаваць пад жыллё. Дарэчы, раёны таксама зацікаўлены ў гэтым, бо ім трэба пазбавіцца ад маёмасці, якая не выкарыстоўваецца, трэба наводзіць парадак на тэрыторыі.

Былыя садкі з дамамі культуры мараць пра новых гаспадароў. Улады клапоцяцца пра забеспячэнне іх захаванасці. Бо чым большая разруха ў будынку, тым менш надзеі, што пакупнікі зацікавяцца памяшканнем. Звычайна ўласнікі добра захоўваюць дзяржмаёмасць, дзякуючы гэтаму будынкі цалкам рэальна аднавіць.

Тыя, хто зацікаўлены купіць сядзібу за 100 тысяч рублёў, безумоўна, разумеюць, што стартавая базавая велічыня продажу — гэта своеасаблівы бонус. Наперадзе — афармленне шматлікіх дакументаў і выдаткоўванне вялізнай сумы грошай на рэканструкцыю будынка. За тры гады, па ўмовах дагавора, пабудову трэба прывесці ў належны стан. Інакш — штраф. Гэта купіць нерухомасць можна па чыста сімвалічным кошце, а вось штрафныя санкцыі за невыкананне ўмоў дагавору — ад 20 да 100 базавых велічынь. Калі ж маёмасць і пасля гэтага не будзе выкарыстоўвацца, яе вернуць ва ўласнасць дзяржавы.

— Зараз распрацоўваецца парадак правядзення электронных таргоў па продажы дзяржаўнай маёмасці, — расказвае Вольга Швідзянкова. — Пакупніку не трэба будзе ў Гомель ездзіць — літаральна з дому можна будзе купляць нерухомасць. Не выключаем, што гэта выкліча чарговы ўсплёск пакупніцкага інтарэсу да нашых аб'ектаў. Будзем імкнуцца зноў першымі ў краіне іх правесці. Не трэба баяцца. Трэба працаваць, і тады ўсё атрымаецца.
Нужные услуги в нужный момент
-20%
-40%
-20%
-50%
-50%
-40%
-45%
-20%
-23%