КУРСЫ ВАЛЮТ
Для физических лиц
Для бизнеса
Банки
Карточки  
Кредиты
Продай свой кредит
Вклады
Экономические показатели
Сервисы
Платежи в интернете
Переводы с карты на карту
Налоговый калькулятор
Калькуляторы
Каталог компаний
Домашняя бухгалтерия

Личный счет


Галіна Абакунчык,

Цэны на мяса і мясныя вырабы працягваюць расьці: толькі да выходных яны маюць павялічыцца яшчэ двойчы. Тым часам пакупнікі заяўляюць, што ўжо ня ў стане набываць мясную прадукцыю.



Мінская "Камароўка" працуе ў звычайным рэжыме: каля вітрынаў з малочнай прадукцыяй — чэргі пенсіянераў, каля прылаўкаў з мясам — людзей вобмаль. Галоўная прычына — нядаўняе падвышэньне цэнаў на мяса, кажа адна з прадавачак:

Прадавачка: "Цэны падрасьлі, і нямала".

Карэспандэнтка: "Што пакупнікі вам кажуць пра гэта?"

Прадавачка:
"Нехта выказвае сваё „фэ“, а нехта спакойна набывае. Пэўна, ад дастатку ўсё залежыць. Расейцы ў нас найчасьцей набываюць".

Карэспандэнтка: "А пасьля чэмпіянату што будзе?"

Прадавачка: "Ня ведаю, пэўна, зацішша".

Цэны на мяса на мінскай "Камароўцы" вагаюцца ў межах 85–150 тысяч. Звычайнае сала каштуе ў межах 100 тысяч за кілаграм. Пры гэтым выбар невялікі, а некаторыя вітрыны ў мясных радах увогуле пустыя. Размаўляю з пакупнікамі:

Карэспандэнтка: "Ці набывалі сёння на „Камароўцы“ мяса?"

Спадарыня: "Апошнім часам — не, дорага вельмі. Па-першае, малы выбар, і кошты высокія. Таксама адпаведна на каўбасы кошты выраслі. Таму толькі ходзім і глядзім. Ня ведаю — мы, беларусы, ня можам ні без мяса, ні без сала. Таму хоць крыху, але будзем браць. Яшчэ хто працуе, то лягчэй, а вось як пэнсіянэрам бедным... Таму вельмі дрэнна... заробкі ў нас не паспяваюць за ростам коштаў".

Спадар: "Сала набыў па 105 тысяч, а мяса — не, вельмі дарагое. Пэўна, гэтак, як у нас, нідзе не даражэе".



Карэспандэнтка:
"Чаму, як вы думаеце?"

Спадар: "Палітыка, пэўна, такая. Свіней у людзей пабілі, а што на гэтых комплексах адбываецца — невядома. Я вось са Слуцку, і памятаеце — калі прэзыдэнт быў на комплексе, там мяса гнілое было. У мяне ў галаве ня ўкладваецца — як так можна гаспадарыць?! Вось такія гаспадары — так і атрымліваецца".

Спадарыня: "Мяса на Камароўцы даўно не набываем — хіба толькі дзіцяці. Сабе адмаўляем — дорага. Я ў дэкрэтным, маем двое малых дзяцей — грошай не хапае".

Карэспандэнтка: "Ці ёсць выйсьце з такой сытуацыі?"

Спадарыня: "Я думаю, ёсць — у змене кіраўніцтва. Заседзелася яно".

Падобна і ў мінскіх крамах: не найлепшае мяса каштуе ў межах 120 тысяч рублёў. Загадчыца адной з мінскіх крамаў называе кошты неапраўданымі і кажа, што нават у бліжэйшыя два дні яны будуць ізноў павышацца:

Загадчыца: "Цэны вар’яцкія: калі нядаўна яшчэ пенсіянер мог купіць сабе мяса нават два кілаграмы, то зараз 300 грамаў бярэ. Лепш катлеткі возьме — слінай заходзяцца і нічога ня могуць сабе набыць. Але гэта ня я накручваю — гэта дзяржава накручвае. У нас толькі гандлёвая надбаўка, і ўсё. Гэта ў галаве ня ўкладваецца, каб мяса 160 тысяч каштавала. Хто купіць мяса за такі кошт? Заробкі ж на месцы, пэнсіі таксама на месцы".

Карэспандэнтка: "Як вы бачыце: на гэтым спыніцца рост цэнаў ці будзе працягвацца?"

Загадчыца: "У мяне на сёння ляжыць тры партыі мяса па 300 кілаграмаў — мы яго атрымлівалі два дні запар. Першая цана — якую вы бачыце на вітрыне, другая партыя ад таго ж холадакамбінату — ужо на 5 тысяч даражэйшая без уліку надбаўкі на дададзеную вартасьць, а наступная — яшчэ даражэйшая. Дык вось я гэтую партыю дапрадаю, заўтра буду пералічваць цэны на 8–9 тысяч даражэй, а трэцюю буду пералічваць на выходныя. Гэта азначае, што калі зараз паляндвіца ў мяне 129 900 рублёў, то ў чацвер-пятніцу яна будзе 140 тысяч, а ў выходныя — 160. Хіба гэта нармальна?"

Для даведкі: свіны філей у Менску каштуе ад 120 да 150 тысяч рублёў, у Расеі — 107, у Польшчы — 74, у Літве — 66, ва Ўкраіне — 62 тысячы ў беларускіх рублях.